Bible

1 掃羅个孻仔伊施波設聽到押尼珥在希伯崙被人㓾死，就當驚；所有以色列人民也當著驚。 2 伊施波設有兩個軍長—巴拿㧯利甲；佢等係便雅憫支族比錄人臨門个孻仔。(比錄係便雅憫个一個地區。 3 以前住在比錄个人已經逃到基他音去；佢等對該時起一直暫住在基他音。) 4 (掃羅个孻仔約拿單，佢有一個孻仔安到米非波設。掃羅㧯約拿單被人㓾死个時，佢正五歲。當佢等死掉个消息對耶斯列傳來，佢个乳𡟓揇等佢逃走；因為乳𡟓忒緊張，卻俾細人仔跌下來，佢就成做跛腳个。) 5 比錄人臨門个兩個孻仔利甲㧯巴拿到伊施波設住个地方去，到該位个時，堵好係盡熱个當晝頭，伊施波設在睡當晝。 6 掌門个婦人家因為簸麥仔當𤸁，就啄目睡。兩兄弟利甲㧯巴拿就偷偷仔入去。 7 佢等入去以後，就到伊施波設个房間，伊施波設當好睡，佢等將佢㓾掉，然後將佢个頭那剁下來，帶等行一暗晡个路，經過約旦山壢。 8 佢等將伊施波設个頭那帶到希伯崙獻給大衛王，對佢講：「看啊，這係你个仇敵掃羅个孻仔伊施波設个頭那。掃羅一直想㓾國王。今晡日上主在掃羅㧯佢个後代身上為吾主吾王報冤仇。」 9 大衛應利甲㧯巴拿，對佢等講：「𠊎指等救𠊎離開所有危險个永生上主老實㧯你等講： 10 在洗革拉有人向𠊎報告掃羅死掉个消息，佢恅到帶來好消息！𠊎就將佢捉起來㓾掉。這就係𠊎給報消息个人个獎賞！ 11 你這兩個壞東西！你等將無辜个人㓾死在厥屋下、在自家个眠床頂，實在真該死！這下𠊎愛因為你等謀殺佢來報復你等，將你等對地上除滅！」 12 所以，大衛命令佢个僕人，佢等就將利甲㧯巴拿㓾掉，並剁斷佢等个手腳，將屍體掛在希伯崙个陂塘滣，然後將伊施波設个頭那葬在希伯崙，在押尼珥个墳墓肚。